Tui luang (waterfall) lâk dân

Landscape photographer chuan tui luang(waterfall) thlalak hi an nei nual zel ang. Waterfall hi lâk a nuam a. A mawi duh em em bawk. Nimahsela, lâk dan tur i hriat miau loh chuan midang lâk sâ thlîr bak chu tih theih i nei lo. Chuvang chuan, cham pût leh mâm tak(silky-smooth)-a tui luang(waterfall) lâk dân  a chipchiarin kan sawi ang.

by Henry De Ccorn

Camera

Aperture leh shutter speed set theihna(manual) awm camera i mamawh a. DSLR camera-ah hian a awm deuh vek a ni. Landscape thlâ la tur hian camera megapixel sâng tha deuh hman theih ni se duhthusam a ni. 18 megapixel chung lama i lâk chuan thlalak a fiah tha ang a, zoom pawh a dâwl dawn a, hlai taka print tur pawhin a iaiawm loh vang.

Full frame body, Canon EOS 1D-X, Canon 5D Mark-III, Nikon D3X, Nikon D4S leh Nikon D800E te hi i hmang thei a nih chuan duhthusam a ni a. Nimahsela a to hlawm em vang hian hmang kan tlem  viau. Nimahsela, chuvang chuan i hnual tur a ni lo. Full frame body ni kher lo, Canon EOS 7D, Canon EOS 60D, Nikon D7000/D7100, Nikon D5100 leh Nikon D3100 te pawh hi hmantlak thawkhat tak an ni. 

Landscape lâk nan rau rau chuan Canon ai hian Nikon hi a tha deuh zawka sawi thin a ni. Nikon-ah chuan full frame body kher lovah pawh hian HDR setting an bilh tel a, landscape lak nan chuan a tangkai em em a ni.

Lens

Fixed lens leh Zoom lens a awm a, fixed lens hmang chuan thlalak a zoom theih loh. Canon lens leh Nikkor 50mm f/1.8 te, 14mm(wide angle lens) te, 20mm etc. te hi fixed lens an ni. Prime lens tî-a kan hriat hi fixed lens an ni vek tho a ni. Fixed lens-a thlalak hi a fiah kalh(sharp) bik a, landscape lak nan chuan a tha bera ngaih a ni.

Kha ti kha chuan zoom lens chu kan hrethiam nghal mai ang a. Thlâ kan lâk dawna lens kan herha thlalak kan zoom theihna lens kha zoom lens chu a ni mai. Entirna: 16-24mm, 16-35mm, 24-70mm, 18-200mm etc. Kan awmna thlak kher ngai lova zoom-a lak mai theihna an nih avang hmun hrang hrangah a tangkai hle.

Waterfalls lâk nan hi chuan wide angle lens hi hman nasat deuh ber a ni.

Lens hi Aizawla awm tân chuan hawh mai theih turin a awm tawh a, i lens mamawh ang erawh hawh tur a awm leh awm loh phei chu ka hre lo va. Ramhlun vênga Kawnga dawrah Camera bungrua hawh theihin a awm nual a ni.

Tripod

Landscape photographer leh tripod hi chu inkawp tlat ang a ni a, a tangkaizia chu landscape photographer bawkin an hria ang. Waterfall la tur chuan Long exposure-a set a ngaih thin avangin camera che miah lova chelh turin tripod i mamawh a ni.

Aperture

Camera hmeh per ruala lens chhunga a kharkhep rawn inhawng zeuh thin hi a inhawn zau zawng a tihdanglam theih a, chu chu aperture a ni. Aperture hi "ƒ" tî-a ziah a ni bawk. Aperture-ah chuan a number tlem tlem hi a zau tihna a ni a, a number a tam poh leh a inhawng zim tihna a ni. f/1.8-a i dah chuan aperture a inhawng zau hle tihna a ni a, camera(sensor) ah eêng a lut hnem ang a, thlalak pawh a êng deuh ang. f/10 vela i dah ve thung chuan aperture a inhawng zim hlê tawh ang a, camera sensor-ah êng a lut tlem bawk ang a, thlalak pawh a thim khup ang.

Aperture hawn zau chuan lens-in a focus chin huamchhung(depth of field) a zim ang a, aperture i hawn zim chuan lens focus area pawh a zau ang a, i thlalak pawh a fiah rual ang. Chuvang chuan, zau(wide) taka thlâ i lâ a nih loh chuan aperture hi f/9 chung lam ni thei hrm se a tha.

Shutter Speed

Waterfall mawi taka lak theih nana pawimawh ber chu shutter speed hi a ni thei ang. Tui khawhthla emaw tui luang cham delh delh leh mâm tak(silky-smooth)a i lak dawn chuan shutter speed 1/15 seconds atanga 1/30 seconds-ah i set a ngai a ni. I aperture set nena inmil tur khan shutter speed hi set ang che.

1/5seconds & 1/100 seconds
by Henry De Ccorn

ISO

A theih hram chuan ISO hi a hniam thei ang berah dah hram hram a tha. Full frame body te i hmang pha lo a ni chuan ISO-1000 chung lam hi chu hmang lo hram hram rawh. Thlalaka noise a tam lutuk chuan edit (post processing)-ah buaina a tam duh a. Noise paih vak ringawt ila thlalak a sharp lo leh bawk si a, chuvang chuan ISO hi hniam hram rawh se.

I duh ang thlapa i set hnuah uluk takin tripod-ah thlalak frame siam la. A theih chuan Rule of Thirds hmang rawh. I lâk zawh hnuah i duh angain thlalak brightness a chhuak lo  nih chuan, shutter speed leh aperture kha han set danglam hret hret la, i tidik ve mai ang.

by Johny Ngurthansanga

Chhun ni sat laia i lâ te a nih chuan nisa lai kha a êng bik vût emaw a ni ang a, chumi hunah chuan HDR(HDR siam dan) hmangin nalh takin thlalak brightness chu a chhuak thei ang.

Thla la thiam tura pawimawh ber pakhat chu lâk tam a ni.

Note: Camera kaihhnawih word hrang hrang hi i hriatthiam loh chuan HE TAH hian a en theih.