Ngaihtuahna mumal hmang lova thlalâk lâk chuan belhchian a dawl lo va. Thil eng pawh ti dawn ila a dân tê tê a lo awm zel ang hian thlalakah pawh dân a awm nual mai a. Chûng dânte chu kan zawm thlap thlap phawt chuan kan thlalak a hlui hlei thei lo ang a, belhchian a dâwl bik ang. Photography Composition Rules hi a lâr zual chu sawmhnih pawh a tling lo va, chûng zing atang chuan a pawimawh zual nî-a ka ngaih ka la rawn thur chhuak leh chhawng a ni. Ka ziah danah hriatthiam loh kan nei a nih chuan comment lamah a inzawh theih zel ang a. Mizo Photographers thiam tak takte pawh zawh belh zel theih an ni a, an inhawng em em reng a ni.
Rule of Thirds:
Photography Rules hrang hrang awm mahse Photography zirnaa kan kal te a nih lêm loh chuan Rule of Thirds hi kan hriat chhun a ni mai zel. A hming ringawt hriaa a awmzia hre si lo hi kan kat leh nawk bawk a. Rules hrang hrang zingah Rule of Thirds hi bel taka kan hria a nih phawt chuan photography-ah hmâ kan sawn hle tihna a ni dawn a ni.
I ngaihruatnain thil kil li nei(rectangle) siam la, chumi chhungah chuan a khamphei zawng leh a chhuk thla zawngin rîn ngil(line) pahnih ve ve dah la, tichuan, a chhungah chuan bâwm(kil li nei) pakua a lo awm ang. Chumi rîn ngil pali(vertical & horizontal) leh rin ngil pahnihte intawhna(intersection point) chu i thlalak thupui ber(subject) i dahna lai tur a ni. Rîn ngil awm sâ atanga awlsam taka enzâwn mai theihna camera a awm nual tawh a, DSLR chinah phei hi chuan a awm deuh vek a ni. Mahse, Live mode-a dah a ngai thung.
.jpg)
Hemi dân hmanga rîn ngîl intawhna(intersection) lai takah leh rîn ngil zûl zuia thlâ i lâk chuan i thlalak a inchawihrual tawk ang a, mi nâwlpuiin i thlalak an en pawhin hmuh nuam an ti ang. Chuti ni lova, thlalak frame lai taka i thlalak thupui ber(subject) i dah ringawt zel a nih chuan hmuh a nawm lohna chen a awm ang. Han en mai pawha leilung dân(natural) ang thlapa kan va hmuh theih khan a thlirtute tan en a nuam bik em em thin a ni.
Leading Lines:
Rîn(line) kâwi ngiai ngiai te, kawngpui thui tak te, hrui invial kawkalh nuk te leh thil inhlûm te hi subject-ah kan hmang dawn a nih chuan subject intanna leh tawpna kha awlsam taka chhui theih a ni tur a ni. Hmuh maia hriatthiam nghal theih a nih loh pawhin engemaw kawng talin a bul leh a tawpna a chhui zawn theih tur a ni bawk.
 |
| by Bsa Sailo |
Kawngpui thui tak kawi ngiai nguai mai kan lâ a, kawng laklawhah kawng kawi zual lai bik a lo awm a, chulai tak chu kan lak hmaih tlat mai a. Chu kawng chuan a hmabaka thlalaka kawng rawn lang leh si kha a va pawh leh em tih hriat theih si lohvin hrilhhai takin thlalak kha a entuten an thlir thei tlat. Tin, subject intanna leh tawpna hi thlalak kil ve ve ni thei se a tha. Nimahsela, thlalatuin mumal taka a ngaihtuaha, a thlirtute rilrua suangtuahna siam belh duhna pû-a thlâ a lâk a, en chet chet hnua hriatthiam theih tur chauhva a lâ a nih chuan a tha lutuk tho.
 |
| Raindrops on a spider web by Malsawmi Parte |
Line hrang hrang a awm thei a. A ngil te, a kawi te, a kual te, invial te, kîkawi tak tak te thlengin. Line chu eng line pawh ni rawh se, line intanna chuan i thlalak subject-ah a thlirtute hruailut thei se la. Chubakah, i thlalaka line chu a thlirtuten an thlir laia zawh ve delh delha an inhriat theih nan i lâk laiin emaw i crop laiin i rilru hmang hle rawh.
Filling Space:
Mihring thlâ kan lak a, an hawina lam aia an hnuchhawn lama âwl(space) kan dah zau zawk chuan thlalak en a nuam ngai lo. Chuvang chuan, a hawina lamah emaw an hmalamah âwl kan dah zau zawk tur a ni. Chû chuan thlalak en a tinuam a, an hmalamah eng thil nge an thlir tih thlengin min ngaihtuahtir thei thin. Hnung lamah âwl kan dah zau zawk hlauh chuan thlalak entute thâw a ti-ipik a, ngaihtuahna min siam thei lo thin.
 |
| by Johny Ngurthansanga |
A pawimawh zual tak tak chauh ka ziak ka tih tawh kha. Nakkinah rules dang pawh ka la rawn dah belh ang. Eng pawh nise, hêng rules-te hi zawm diak diak kher an ngai chuang lo va. I thlalak nalh i tihzawk theih nana Rule of Thirds bawhchhiat a tûl a nih pawhin a pawi em em hran lo. Mahse Photography Rules ang thlapa thla i lâk chuan a mawi rei bik thung ang. Thla lâk nuam leeee :-)
