Camera sensor tihfai dân

I thlalakah i lâkna hmuna thil awm ve lo a rawn lan tel tlat chuan buaina tham a tling ve a ni. Hmun ruak leh mâm, rawng dangin a pawlh buai miah loh emaw chhumin a pawlh miah loh vân dum pawl thlâ i la a, i thlalakah thil bâl dum a rawn lang a. Chu chu thil pahnih vang a ni thei. I lens-a hmuar(fungus) a awm vâng a ni thei a. I camera sensor-a bawlhhlawh them a tân vâng a ni thei bawk. I camera-a fungus awm chu camera lens siam thiam leh khâwl nei i nih loh chuan tihfai ve ngawt chi a ni lo. Nimahsela, i camera sensor bâl erawh nangmahin i tifai ve mai thei ang. Dâwra i tihfaitir man a sâng si a.

Camera sensor a balh thinna chhan ber pakhat chu thli thâwt laia lens kan thlâk thin vang hi a ni. Kan hmuh tham mang loh bawlhhlawh boruaka lêng kha camera atanga lens kan thlawn laia sensor inhawn chhung khân a rawn lût ta thin a ni.

I camera sensor i tihfai hmain sensor bâl avanga i thlalaka bâl lo awm a ni em tih i chian hmasak phawt a ngai. Sensor bâlh vang ni lova sensor tihfai ringawt hi a uiawm. I camera viewfinder(a bih tlangna) atanga thla i lak laia bâl i hmuh chuan i camera viewfinder darthlalang te tak tê-ah khan bawlhhlawh a kai a ni thei a, i camera mirror(sensor chhîntu darthlalang phêk kil li nei)ah bawlhhlawh a awm pawh a ni thei. Chutiang harsatna i tawk a nih chuan camera tihfaina hmanruain i tifai thei ang a, ear bud(beng hawlhna)-in uluk takin i hawlhfai thei bawk ang. Camera sensor bâl chu thlalak hnuah bak a hriat loh va. Thlâ i laklaia mit lawnga bâl i hmuh kha chu sensor bâl a ni lo hrim hrim a ni.

A nih chuan engtin nge sensor bâl chu kan hriat tâk ang? Harsa lo tak a ni. Thlâ i lâk laia aperture zau tak(f/1.8-f/2.8)-a i dah chuan i camera sensor bal kha a lang vak dawn lo va. Computer-a thlalak i dah luh hnua i zoom vak hnuah chauh bawlhhlawh i hmu thei ang. Chuvang chuan i aperture kha zim takin(f/8 - f/16) dah la, sensor-a bawlhhlawh kha a lang chiang kuar dawn a ni. A theih phei chuan aperture zim theihna ber(entir nan f/32)-ah dah la, bang(wall) mâm tha tak leh rawng dangin a pawlh buai loh emaw, lehkha phêk vâr emaw, vân dum pawl thiang kûk mai emaw han la chhin la, chu chu computer-ah en leh la, Photoshop i hmang a nih phei chuan Auto Colour(ctrl+shift+B) pê la, sensor-a bawlhhlawh a awm a nih chuan bawlhhlawh awmna lai chu a rawn dum thliah thliah mai ang. Chutianga uluk taka i enchhin hnua bâl i hmu a nih chuan i sensor chu tihfai a ngai ngei tihna a ni.

Sensor bâl

Company hrang hrangin an camera siam te an rawn thuam tha tawh a. Camera thenkhat chu amaha sensor intifai nghal mai thei(Auto Clean Function) an ni. Sensor kha zawitêin a khur cher cher a, bawlhhlawh tâng te chu an tla mai thin a ni. Canon EOS 7D te pawh hi Auto Clean a nih avangin camera switch off rual chiah hian automatic-in sensor a rawn intifai nghal a ni. Nimahsela, camera-a sensor clean an rawn dah tel hmang pawha tihfai zawh kim theih loh bawlhhlawh a awm ve a, chûng bawlhhlawh chu blower hmanga chhêm fai mai theih a nih loh chuan hrukfai a ngai thin a ni.

Blower hmanga camera sensor chhêmfai lai

I tihfai nan sensor hrukna tur bika siam lapaw kuang nei(Sensor Swabs/cleaning pads) leh a tihfaina tur tuirîl(Eclipse Fluid) i mamawh a. Online shopping-ah pawh lei tur a tam a, Aizawlah pawh a awm ang, mahse a tha chi lei hram hram rawh. I hawlhfaina tur lapua/puan(swab) chu i camera sensor nen a hlai zawng inchen chiah rawh se. I hawlhfaina tur lapaw hmawrah chuan Eclipse Fluid chu far hnih thlawr la, uluk takin i camera sensor chin chiah chiah kha vawikhat i hru phei ang. I hawlhfaina khan vawi khat aia tam hru lo la, a dangin i thlak leh nghal dawn nia. I hruk dan zawng chu a inang thlap tur a ni a. I veilam zawnga i hru a nih chuan i veilam zawng bawkin a vawihnihnaah i hrût phei leh ang a, a si chê chê-in i hru tur a ni. Vawi khat tihfaiah hian vawi hnih aia tam chu hru lo hrâm ang che.

Sensor Cleaning Kit/tool

Sensor hrût fai lai

I hrukfai dawn hian camera lens thlawn mahla camera sensor a rawn lang dawn lo va. I camera battery charge full phawt la, chumi zawhah i camera-ah chuan Lock Mirror Up setting a awm lo a nih chuan Bulb Mode-ah dah la, i kut lehlamin camera hmeh perna(shutter button) i hmet char char ang a, i hmeh chhung zawngin camera mirror a chho reng ang a, sensor a rawn lang ang a, chumi chhung chuan i tifai dawn a ni. Hmanhmawh tak leh uluk tak siin i tifai dawn nia. Sensor hawn rei lutuk chu a tha lo.

I kût zungtanga mirror i kuai chho ringawt a nih chaun sensor chhintu hi a inhawng dadwn chuang lo a ni.

Bulb mode-a i dah hnuah chuan i hmeh chhung zawngin sensor a rawn inhawng tawh ang.

A tihdan tur ang thlapa i tihfai zawh hnuah kan sawi tawh ang khan bawlhhlawh a awm leh awm loh en nân thlâ i la leh chhin ang a. Chuta bawlhhlawh a la awm cheu a nih chuan a tihfai dan tur ang thlap hian i tifai leh dawn nia.

Tihchhiat palh hlauh lutuk avang leh a tihfai dan hriat loh avanga sensor tifai ngam tlat lo kan awm ang. Nimahsela, ho têa hrûk chhiat mai theih turin camera siamtute hian an siam bik lo tih hriat tur. Chutih rual chuan uluk loh avangin a hrûk rân ve hlauh theih tho va. Chuvang chuan a tihfai dân kan sawi ang thlapa tih hi a him ber a ni.  Camera hi a to si a. :-)

http://ropuiaphotography.in/blog