Thla lâk dân leh camera setting zir nan hian hun a ngai hnem hle thin a. Dawhtheihna tel lo phei chuan a inzir hleih theih loh. Tunah chuan ISO chanchin leh a hnathawh dân kan thlûrbing dawn a ni.
Light hi photography-ah chuan thil pawimawh ber pakhat a ni a. Light chuan i thlalak lan dân a kaihruai a ni. Thlalak hi light hmanga siam a ni a, camera sensor-ah light a rawn lut a, chu chuan thlalak a siam a. Chu chu Digital Photography a ni. Film Photography a awm bawk a. Film photography-ah chuan roll film-ah light a rawn lût a, chu chu hmun thimah bâwlhlo(chemical) nên an sawngbawl leh a, chumi hnûah thlalak a rawn chhuak thin a ni. Kan thupui kan pên san têp 😌 .
Camera-a thlalak exposure tihdanglamna pakhat chu ISO (International Organization for Standardization) hi a ni a. Shutter Speed leh Aperture te nen an thawk kawp a ni. ISO hi ASA tiin an sawi bawk. Entirnain bul tan phawt mai ang.
Zânah thla la turin ka chhuak a. Tripod ka nei si lo va, camera hûnna tur remchang a awm bawk si lo. Thla la tur chuan ka lâk tur ka han tin ta vang vang mai a. Shutter button chu ka half press a, exposure meter mil tura ka han set chuan 1/15 seconds-a shutter speed ka set a ngai ta tlat mai. 1/15 secs-a ka lak chuan ka thlalak a phê dawn tih ka hre si a. Chutah tak chuan ISO hmangin ka tidanglam ta a, ISO chu 800-ah ka dah tâ a, chutah chuan 1/80 seconds-in shutter speed pawh a set theih ta a ni. Tichuan, thla lak exposure chu a dik ta chiah bawk a. Chu chu ISO hnathawh chu a ni.
Camera sensor chak tha leh hlâi deuhah chuan ISO pawh hi a thawk tha ve zel a. Camera tha tak takah chuan ISO-3200-ah pawh thlalakah noise a awm mang lo. Nimahsela, i camera ISO kha a sân theihna lai berah pawh 3200 chauh a nih chuan ISO 800 vela i set pawhin noise a awm teuh ang. Camera that leh that loh azir a ni a. Camera that leh that loh tehna ber a ni bawk.
A hriatthiam theih uarin ka ring tawh a. A nih chuan, thla kan lâk reng rengin thlalaka noise a awm tam lutuk loh nan ISO hi a hniam thei ang berah kan dah thin tur a ni. Nimahsela, i lâkna hmun tur a thim lutuka, flash i hman theih si loh chuan ISO tihsan a ngai ngei ngei a ni. ISO i tihsân poh leh shutter speed i dah sang thei dawn tihna a ni.
Shutter speed leh aperture hmanga exposure kan set a nih chuan noise a awm ve thei lo. A chhan chu camera sensor-a light luh dan kan adjust vang a ni a, sensor-a natural light luh tam lam kan adjust mai chauh a ni. ISO ve thungah chuan camera body-a khâwl(processor) khân thlalak exposure a tisâng ve thung a, chuvang chuan ISO kan tihsan chuan noise a rawn tam ta thin a ni. Hriatthiam awl theih dan tur ber chu, photoshop-a thlalak brightness i tihsan ang deuh kha a ni mai.
Camera tam zawkah chuan Auto ISO setting a awm a. Chumi hmang chuan automatic-in thlalak exposure kha ISO-in a adjust thei a ni. Hmun thim lutuka Auto ISO-a i set chuan ISO hi 3200 velah te a awm ang a, thlalakah noise a tam duh viau. I camera-ah khan han adjust kual vel chhin la, kâr lovah i hrethiam mai ang.
RAW format-a thlâ i la dawn a nih phei chuan ISO hi a hniam bera dah a tha ber. RAW-a thlâ kan lâk chuan camera-a automatic-a noise paihtu kha a hman ve theih tawh loh va, i thlalak nihna ang ang khân a rawn la chhuak a. ISO i tihsan chuan JPEG format-a i lâk ai khân a setting in-ang rau rauvah noise a tam leh zual ang.
I camera-a ISO dah sân theihna ber(6,400 or 25,600)ah khan ISO i set chuan i thlalakah noise a tam hle ang. Chuvang chuan i camera kha hrechiang turin bêl tam la. Roll-film camera hnuchhawna Digital camera hmang theia i awm kha i vannei tih inhria la. I camera kha chûl hliau hliau reng ringawt mai rawh.
I thla lâk tur azirin ISO hi i set thiam ve a ngai. Mizoram Premiere League hi season hnih ka lâ a, zâna an khelh zawng zawng hi ka lâk chhung zawngin ISO-3200 chung lam char charin ka lâ. A chhan chu, Lammuala Flood Light hi duh ang tawkin a êng lo va. Inkhel kan lâk si avangin shutter speed dah hniam ngam a ni lo. Daily Newspaper(Vanglaini)a tarlan a ni thin a. Thlalaka noise tam tak hi chu han print chhuah hnu hian a ziaawm ve deuh thin bawk a. Chûngte avang chuan ISO ka dah sang thin a ni. I lâk tur milin ISO set thiam hle rawh. Thla lak nuam leeee 😊👍.
