Panning
Subject chêt dân (motion) tilang chiangtu pakhat chu panning hi a ni a, shutter speed muang hmanga lâk a ni. A tlangpuiin 1/60 seconds hnuai lama lâk a ni a, a aia sang chinah hi chuan subject background a phê tha vak tawh lo. Shutter Priority mode hi panning lak nan chuan an hmang deuh ber a. Nimahsela, manual settings hmanga i duh ang thlapa i lak tur mila camera i set thei a nih chuan duhthusam a ni. Panning hi focal length sâng tak nena lâk chi a ni lo va, focal length sâng (zoom sang tihna a ni mai) i hmana, tripod/monopod i hman tel si loh phei chuan i subject thlengin a blur vek ang. Chuvangchuan, wide deuh hleka lâk hian lâk fuh a awl ber mai a, nalh pawh a nalh hma deuh bik a ni. Panning lâk laia thil pawimawh em em pakhat chu photographer-ina camera a herh kual dân hi a ni a, subject speed-a camera i her lai khân i kut hmangin i camera kha her lo la, i kâwng atangin i taksa kha her kual zawk la, camera a che tlem a, subject a sharp hmâ bik. Panning hi vawi khat lâknaa la fuh nghal an awm chuan an vannei tâwpah ngai ang che. Professional photographer pawh hian panning thlalak fiah tha tak pakhat nei tur hian vawi 20 chuang te an la nawn awn awn thin ania. Hê thil hi chu thiamna piah lamah vanneih thil a ni ve. (Panning thlalak han vawmbei mai tur ka hmu lo tlat mai, google image search-ah in lo zawng ve leh mai dawn ami?)
I thlalak a sharp zawk nân IS/VR off rawh
Focusing
Camera-ah hian focus zawnna hi hmun hnihah a awm a, pakhat chu shutter button a ni a, pakhat leh chu camera body hnung (LCD awmna lam)-a mi hi a ni. Back focus button hi hman nachang hria hi kan awm mangin ka ring lo a, a ṭhatna kan hriat loh vang mai mai a ni. Shutter button hmanga i subject i focus chuan i lens chiah khan i subject kha a focus a, camera-in a focus ve lo tihna a ni. Back focus button i hman ve thung chuan i camera leh lens kha a tangkawp ve thung a ni.
Game ṭan hmain warm-up i neih ve a ngai
Players ten inkhel tan hmaa warm-up an neih hi photographers tan a ṭangkai em em a ni. Inkhel ṭan hmain players ho hmangin camera settings kan adjust zung zung thei a. A chîk mî tan phei chuan players khel ṭha thei deuh tur te nên lam a ngaihruat theih phah a, chu chuan photographers awmna hmun tur a kawhhmuh dawn a ni. Game ṭan hnua kan lâk hmaih lo awm palh, player khel ṭha bawk si angte pawh inkhel ṭan hmaa thlalak kan neih zingah a lo tel mial thei bawk.
Khêlmual chauh focus loh tur
A game-a chu pawimawh ber nimahse, a chhehvela thil thleng han lâk âwm tak tak hi a awm ve thin a, chû'ng chu zawn peih ve a ngai. Fans lamah boruak engemaw deuh thleng a awm chuan chû'ng pawh chu han click tel zeuh zêl la a ṭha ve a ni. Fans han sawi takah chuan chanchinbua fans au lai thlalak emaw an han tihchhuah hi chuan an inzawng dû dû a, an inhmuh chuan an hlim ve thei phian an tî :-) . Thlâ i lâk laiin ruah a lo sur a, a sur tam ang reng khawp mai a, a sur tamzia leh game a tihkhaihlakzia tihlan i duh si a. Chutiang hunah chuan fans lamina ruah an do lai te, khawi emaw laia tuitling nasa tak thlâ te kha han la ta la, a entute mit a tlai deuh dawn a ni. Chutiang zel chuan i hun tawn mil zelin i thlalakna hmun chhehvel melh kual la, thlalak dangdai tak leh mî rilru khawih tak tur i hmu fuh ve leh nawlh zel mai ang.
Lammual bikah
MPL season hnih chu Lammualah thlâ ka la ve tawh a. Hei bakah hian MPL season ka lak lai kara inkhel dang lo tlazep neuh neuh a awm bawk a, chung zingah chuan I-League te leh Hoffenheim leh Mizoram inkhel tih angreng te a awm nawk a, ka lens chhuanawm loh tak hian ka la ve naw naw ṭhin a ni. Lammualah hian flood light 4 vuah a ni a, hêng light te hi duhthu a la sâm lo em em a ni. Mit lawnga gallery atanga inkhel entute chuan, "a va êng tha pem pum tak", pawh an lo ti mai thei, mahse camera chuan, "Huiham, a va'n thim tak, u Ropui", a ti daih thung a ni. Chuvang chuan light ên ṭhatna lai ber hi ka zawng kual ve ngat ngat zel a, chuta ka hmuh chhuah tak chu Cinema Hall lama goal hnung chhak chiah (ground level) atanga han lâk hian light hi a fuh berin ka hre ta a. Nimahsela, camera dang leh lens dang hmangte tan chuan helai aia hmun ṭha pawh hi a awm mai thei. Helai hmun ka han thlan kher kher ṭhin nachhan pakhat chu Ads banner lan kim theihna ber a nih vang leh gallery a mipui ṭhû lan nalh theihna ber a nih vang a ni. Thlang lamah awm ta daih ila chuan kan thlalak background chu chinai hnawih var chiah a ni ang a, a changin thlalak a over-exposed ang a, a nalh thei dawn lo a ni. Tlai lamah pawh helai hmun tho hi a tha lai a ni a, ni tlakna lam a nih avang hian êng hnuchhawn zawngin kan ṭhu a, players hmêl chu nî-in a chhun êng ta chiah bawk a, a fuh ber a ni. Engpawhnise, i camera ania, AR Lammual ania, ka Lammual pawh a ni lo a, khawi hmunah pawh awm la, engtin paw'n lâ la, a pawi reng reng lo :-) .
