Mizoram hian sports-ah hmâ a sâwn chak em em mai a. India rama sports-a hmasawn chak ber state kan ni hialin a lang. Tunah hian thenkhat chuan sports photography hi eizawnna'n an hmang mêk a. Sports lama hmâ kan sawn chak dan atanga chhût phei chuan tun atanga kum sawm vêl a vei leh meuh chuan sports photography lamah hian kan la tlân suau suau mai thei a ni. Sports photography hi landscape photography te, portrait photography te leh photography huang dangte nên a inpersan riau a. Kan subject tur a chêt vut vut tawh avang hian tripod-a camera hûna landscape han lâk ang ngawt kha a ni tawh dawn lo va, inzir tham a tling ve a ni. Nimahsela, thiam leh nâl taka sports thlâ i lâk theih hnû-ah chuan thil dang lâk aiin nuam i ti tawh zawk ang. A chhan chu, sports thlalak chu han edit vê vak chi a ni lêm lo a, effects han pêk vak chi a lêm lo bawk a, i lâk laia settings i uluka, frame i uluk bawk chuan han khawih chhunzawm vak tûr a awm tawh lo a, a hahdamthlak bîk a ni. Nimahsela, sports lâk nan chuan camera leh lens tha deuh bik hman a ngaih avangin a sum-hrâwm erawh a na deuh.
Lens leh Camera
Portrait lâk nân chuan 18-55mm f/3.5-5.6 te, 50mm f/1.8 te, 85mm f/2.8 te leh 24-70mm f/2.8 te hi an tha viau a. Nimahsela, football lâk nân chuan an hmantlak lêm lo. Football leh outdoor games hrim hrim lâk nân chuan focal length sâng tha tak i mamawh. Entirna'n, 70-200mm f/2.8, 200mm f/2.8, 400mm f/2.8. Hêng lens-te hi professional photographer te'na an hman thin a ni. A to hlawm em em a, nuaih kai lo a awm lo. Nimahsela, i hlawh a tam dawn phawt chuan hêng lens hi lei hmiah rawh. Third party lens (Tamron, Sigma etc) hi a focus a chak tawk loh thin avangin a theih hram chuan hmang suh. Lammuala Mizoram Premiere League ka lâk thin lai khan pawisa ka neih loh avangin (tunah pawh pawisa chu ka la nei chuang lo) Canon 55-250mm f/4-5.6 lens ka hmang a, chhûnah chuan han hman ve theih nâw nâw mahse, a aperture-in duhthu a sâm loh avangin zân lamah chuan hman a hrehawm a, a focus a muang êm êm bawk. Lens tha khi i budget-in a pha lo a nih chuan 55-250mm f/4-5.6 STM (canon) te, 28-300mm f/3.5-5.6 te, 70-200 f/4 te, 75-300mm f/4-5.6 te leh focal length sâng lam apiang i melh dawn nia.
Sports photography-ah chuan continuous shooting hi thil pawimawh ber pakhat a ni. Chuvang chuan, camera i lei dawnin a frame per second (fps) hi ngaipawimawh la, 8 fps chin tal lei tum rawh. 8 fps a nih chuan shutter button i hmeh chhung zawng khan second khat chhunga vawi 8 per hmanin i camera kha i set thei tihna a ni. Canon-ah chuan 7D te, 7D Mark II te, 1Dx te hi sports lâk nâna hman lâr ber an ni. Sony hian fps sâng tak tak leh to lutuk si lovin camera an rawn siam chhuak tawh bawk. Nikon-ah chuan D7100 te leh D4 te hi a fps a sâng. Sports-ah pawh fps sâng tak hman ngaih lem lohna a awm ve tho a, chuvangchuan, i lâk tur milin camera lei rawh.
Memory Card
Memory card chak tha tak tak an siamna chhan ber hi chu sports photographer ten-a continuous mode-a thlâ an lak pawha harsatna an tawh loh nan a ni. 5 fps hnuai lama thlâ i lâk chuan memory card chak tha vak lo pawh hmang la harsatna i nei lem lo ang. Nimahsela, 8 fps chin chung lama i camera i set-a, continuous-a i lâk chuan memory card muangah chuan a in-load ṭual ṭual emaw, a fps a timuang/tihiam emaw a ni ang. Chuvang chuan 400x chung lam tal chu hman tum ang che.
A chhunzawmna'n Part-II ka rawn ziak leh thuai ang. Chutah chuan Sports Photography kalhmang leh hriat tur pawimawh ka rawn ziak dawn nia.
