Tuna kan sawi tur pawh hi landscape photographer-te tan bawka chhawrbawk theih tur thil a ni a. Chhûn lama thla lâk hi chu a tû-a mai pawh hian mawi tluangtlam tak hian an chhuah thei zul mai a. Nimahsela, zân lama thlâ la mawi tur erawh chuan hmanrua a ngaih tam mai bakah a tih dân tè riau a awm ve a. Chû bákah hun a duh rei bik êm avangin mi nawlpui tân chuan zân thla lâk hi pâmtrûl mai a awl em em bawk a, mi dawhthei tâwp nih a ngai ve a ni. Chuvang chuan, kal pah mai maia thla lâk duh tawk chauhva rûn dâl lek ang hrima thlâ la ve mai mai thin tan chuan zân thla lak dân hi chhiar loh law law a manhla zawk hial ang.
Milky way leh star trails la tura i hmanraw mamawhte:
 |
| Milky Way Milky way hi ka laksa ka hmuh zawh tawh mai loh avangin google image search ami ka rawn la chhuak ta mai |
- DSLR camera emaw a tlukpui camera, manual settings awmna
- Tripod emaw camera che miah lova hûn theihna tur
- Remote shutter (star trails lâk nân bîk)
- Torch light (zâna thlalak dawn chuan subject focus lâk nân a tangkai)
- Wide angle lens
- Long exposure-a i lâk dawn avangin a inlâk chhûng nghah pah nana cigarette leh kuhva ken a fuh a, kawr lum ken a tha bawk :-)
Camera settings:
- Aperture: Milky way ngawr ngawr a hlanga lâk tawp ai chuan thlalak frame sir khawi emaw laiah a thlalak inchawih nalh turin in chhe bim bem emaw milky way thlalak tihnalh belh theihna tura i ngaih kha han lan tel tir la, a mawi phah em em dawn a ni. Chumi atan tak chuan wide angle lens khi a tangkai tâ a ni. Milky way lâwng i la duh a nih chuan aperture zau thei ang berah uluk taka focus adjust-in set la, aperture i hawn zau chuan milky way kha êng tha takin a rawn lang thei dawn a ni. Nimahsela, i thlalakah thil dang lang tel tura i duh chuan aperture i dah zauh si chuan a fiah rual lo mai thei a, chuvang chuan foreground leh background fiah kawp thei turin aperture chu set rawh.
- ISO: I camera azirin ISO i dah sangin i dah hniam thei a. Full frame body te i hmang a nih chuan ISO 6400 thleng pawhin a set ngam ang. Mahse crop body i hmang a nih ve thung chuan 3200 aia sângah chuan dah loh hram a tha, noise a tam dawn lutuk.
- A chunga settings pathum kan sawi zulzui khian inchawih nalh tawk chiah turin i camera han set la, han la chhin a, i thlalak a la thim lutuk emaw a êng lutuk a nih chuan
- Milky way i lak dawn chuan i camera shutter speed kha 30 seconds aia rei lovah dah hram la. A chhan chu, khawvel a vir avang hian arsi hi zawi muangin a kualin mit lawnga hmuh tham si lohvin a inher a. Chu chuan shutter speed dah hniam lutuk chuan arsi inher lai a la hman ta thin a, arsi chu sei zêt angin a lang ta thin a ni. Arsi a pherh chuan milky way a lang hlâwm tha lo thin a, thlalak a nalh loh phah thin a ni. Chuvang chuan 15 secs leh 30 secs inkarah shutter speed i dah thin dawn nia.
- aperture leh ISO hmang khian i set leh dawn nia.
- Star trails i la duh a nih chuan Shutter Speed hi remote shutter hmanga darkar hnih chuang i hmeh per a ngai dawn a ni. Remote shutter i neih loh chuan tripod leh camera tiche miah lovin 30 seconds-a shutter speed set-in frame engemaw zât i lak a ngai a, chûng frame chu photoshop hmangin emaw, HDR software hmangin emaw thlalak pakhata chhuak turin i zawm thei a, i zawm hnuah chuan arsi chu a rawn lang kual ve pup mai dawn a ni.
 |
| Star Trails, He thlalak pawh hi remote shutter ka neih loh avangin google ami ka rawn dah leh ta mai. |
Milky way lan loh zân a awm a, chuvang chuan milky way lan hun chân fuh ve a ngai. Tuisenchhuahah chuan November-ah mit lâwnga hmuh theihin milky way a rawn inlâr a, January ah meuh chuan hmuh tur a awm tawh lo. Milky way hi mit lâwnga kan hmuh phâk bâk kan la duh a nih chuan a inkham dan leh a awm hmun hriat mai a harsat thin avangin a enchhin nana lâk hmasak deuh treuh a ngai thin. Chuvang tak chuan dawhtheihna a pawimawh a ni. Chhûna kan mit lawnga kan hmuh theih mai thlâ kan lak ang ngawt kha a ni lo va. Vawi eng emaw zat lak that a ngai thin.
