Photographer tam tak tihnual thintu chu thlalak tha tak kan neih si a, suma chantir ngaihna hlawl hriat lohna hi a ni. Nalh tak takin thlâ kan lâ a, facebook leh social media hrang hrangah te, lehkhabu leh chanchinbuah te kan hriat loh leh kan remtihna la miah lovin kan thlalak nalh kan tih ve em emte kha an lo hmang leh ringawt thin. Intellectual Property Right leh Copyright Act/Rules kan hriat loh vângtein thinrim tak chung siin khin lohva kan tlâk leh mai thin. A rilru natthlak thin a ni. Mizovah pawh hetiang kaihhnawiha buaina tawk tâ hi sawi tur an awm ta phauh phauh bawk. Hêng kan thlalak nalh tak takte hi facebook leh social media-ahte lukhawng nei lova post leh ringawt thin ai chuan kawngro su zawka kan thlalakte kan sawngbawl a ngai a ni.
Mizo photographers-ah hian thlalak hralh thin chu tun dinhmunah chuan kut zungtang pawhin a daih ang em aw tih tur a ni. Chûng thlalak hralh thin tlemte te lah chuan an thlalak an hralh dan kawng hmang min sihchhuah ngai bawk si lo.
Khawhawi zîm deuh tân chuan kawng a kaw mawlh lo a ni. A hmasain online-a thlalak hralhna website lâr zual i han tarlang teh ang.
Khawhawi zîm deuh tân chuan kawng a kaw mawlh lo a ni. A hmasain online-a thlalak hralhna website lâr zual i han tarlang teh ang.
1) Dreamstime
2) Shutterstock
3) Fotolia
4) iStockphoto
Hêng website atangte hian mi tam tak chuan an thlalak hmangin sum an hai lût mek a. An thlalak te website-a an upload tawh chuan midangina an thlalak an lei hun lo châna lo thut der der a tawk tawh a. Hêng thlalak te hi kum 10 chuangte website-ah a dah theih a, khami chhung zawng khan engmah dang buaipui ngai lovin pawisa kan lo la lut thei a ni.
A chunga website kan dah hi a thlawna thlalak hralh theihna website a ni a. Thlalak hralh thei tur chuan an website-a kan in-register a ngai a. In-register nan hian email te, phone number te leh Bank Account/Debit Card neih a ngai a ni. Registration i zawh fel hnuah i thlalak hralh duh i upload ang a, chu chu website lama thu neitu ten an lo endik ang a, i thlalak chu an pawmsak che chuan zawrh turin website-ah a awm tawh ang. Thlalak hi model release nena upload kawp a ngai tlangpui bawk. Model release form i duh chuan hetah hian a download theih.
Website hrang hrang hian dan hrang an nei thluah a, chû'ng an dante chu thlalak upload dawnin hmuh mai theihin an tar chhuak ve thin bawk. Thenkhatah chuan thlalak hralhna man hi $100 a tlin hnuah a lak chhuah theih a. Website hrang hrangah a inang lo thluah ang. Chû kan thlalak hralhna man chu kan bank account-ah emaw kan postal address-ah emaw a rawn thleng mai dawn a ni.
Thlalak man hi a upload-tu bithliah theih tura siam a ni lo deuh zel a. Thlalak hralh nana kan website hman te nen percentage-a insem thin a ni a. Entirnan, shutterstock-in 60% a chang ang a, thlalak neituin 40% a chang ang. Kan thlalak kan hralh duhna website-a kan in-register tawh chuan han bona tur a awm hran lo.
Mizo tân online-a thlalak hralh hi a hlawkin a rinawm. A chhan chu Mizoram hi ram dangina min tlawh pawh loh state kan ni a, ramngaw chhah tha tak tak te, lui nalh tak tak te, tlai ni tla nalh tak te, mizo thil hlu leh hmun hlui te leh hmun tam tak ram dang miina an la hmuh ngai loh hi a tam em em a. Hêng thlalakte hian hnamdang mite mit a la hle turah ka ngai. Ka theih ang angin online-a thlalak zawrhnaah Mizoram chhunga thlalak ka zawng a, istockphoto-ah hian Aizawl thlalak pakhat chu ka hmu ve a. Chu pawh chu foreigner lâk a ni leh nghal a. Mizo photographer-te hian tan kan lak a ngai nasa hle a ni.
Kan website tarlan bakah khian thlalak zawrhna website hrang hrang a awm a, a chunga website palite khi a lar zual leh a thlawna thlalak zawrh theihna website an ni a, an lar bawk a, a tha berah an chhâl theih ang.
Kan camera hman man tal hi chu hmehchhuah tum ve tur. :-)
