Battery Grip: Camera mawnga camera battery vuah belhna bâwm a ni a. Camera-a battery vuahna pangngaia battery kha kan phawi a, battery dang pakhat nên battery grip-ah chuan a pahnihin kan vuah tâ a.Battery pahnih kan hmang ta tihna a ni. AA+ Battery magazine an nei tel ziah bawk a, camera battery pangngai hmang lo hian pencil battery a hman theih tihna a ni.
 |
| Camera leh Battery grip |
Battery Grip-ah hian camera hmeh perna(shutter button) te, thlalak zoom-na(magnifier) button te a awm tel a, battery grip model azirin hmeh tur hi chu a tam hlei mai a ni. Thenkhatah phei chuan LCD te tak tê a awm bawk. Shutter button a awm avang hian portrait(a tung zawng)-a thla lâk pawh a nawm phah bik. Grip thenkhatah chuan LAN leh wifi support pawh a awm.
 |
| Battery grip |
Football photographer te, wildlife photographer te hian lens hrawl tak tak an hman thin avangin camera leh lens a inbûk tawk lo thin a, hemi tihziaawm nan hian battery grip hi an vuah thin bawk. Camera a rih na nâ nå chuan che der der a tlem a, thlalak a fiah hma bik.
Canon leh Nikon hi camera tha fâl bik an nih avangin an DSLR camera ho hian battery grip an hmang thei deuh vek. Company dangin battery grip hi canon leh nikon hman theih tur an siam nual a, a tlâwm thei hle bawk.
Wireless Remote Shutter hi camera body-a shutter button hmet lova remote hmanga camera hmeh perna a ni. Football kan en thin chuan goal net hnung chiaha hniam tê têa camera inrem thrut hi kan hmu thin ang. Hêng ho hi remote shutter hmanga hmeh per an ni tlangpui. Wildlife photographer ho hian an hmang nasa hle bawk. Camera bula awm lovin an lâk tur ramsa an rawn kal hnaih ve leh hmun him chin atangin an lo hmet per mai a ni. Chubakah, zâna long exposure(shutter/aperture rei tak inkhap)-a thla kan lak dawnin a tangkai hle. Star trail lak nan phei chuan hman a ngai ngei ngei tluk a ni.
 |
| Wireless Remote Shutter |
Remote flash trigger: Camera chhîpa speedlite(flash lian lâk hran theih) vuah kher lova duh duhna hmun(angle) atanga speddlite-a kan lak duh kan chhun tirna hmanrua a ni a. Studio-ah an hmang tangkai zual. Remote trigger-ah chuan camera chhipa flash kan vuahnaa vuah tur pakhat, transmitter a awm a, pakhat dang leh chu speddlite-a vuah tur, receiver a ni. Trigger thenkhatah chuan receiver pakhat aia tam nei te pawh a awm.
 |
| Remote flash trigger |
Company hrang hrangin flash trigger hi an siam a, chû'ng zinga helaia kan hmuh tlanglawn deuhte chu- Digitek, Simpex, Sonia, Pico, Aputure leh Yongnuo te hi an ni a, Rs 1300 man vel atangin a awm tan. Aizawlah chuan Photo House leh Kawnga dawrah lei tur a awm nual ang.
Lens Filter: Lens hmawra darthlalang bial kan vuah thin hi Lens filter a ni a. Lens filter hi a fim(rawng nei lo) a awm a, rawng nei leh thim deuh reuh chi a awm bawk. Bawlhhlawh leh thildang lakah Camera lens a venghim a. Thlalak rawng a tidanglamin a timawi thei bawk a. Lens hmâwr thread-a herh luh ngai chi(screw-in filters) leh herh luh kher lohva vuah chi(Slot-in filters) a awm.
Lens filter hian thlalakah êng a pe rual thei a, mawi takin thlalak rawng a tidanglam thei bawk. Landscape/scenery la thin tan a tangkai em em a ni. Filter hi chi hrang hrang a awm a, chûngte chu:
 |
| Lens filter |
1) UV Filter
2) Polarizing Filter
3) Color Balancing Filter
4) Neutral Density Filter
5) Soft Focus Filter
6) Black & White Filter
