Tam tak hi chuan kan hmanna tur nena inmilin camera hi kan lei lo fo va. Ṭhenkhat chuan a to apiang hi ṭha turah an ngai a, a dik rêng bawk a, a to na nâ na hi chu a ṭha a ni. Mahse, a man to ringawt ai mah chuan kan hmanna tur atâna a ṭangkai dàn tur khân kawngro a su zawk. Entirna'n, innei thlâ la ṭhin tur i nih laia camera frame per second sâng tak i lei kher kha a ṭûl lêm lo va, chutiang bawkin, sports/wildlife la ṭhin tur i nih laia full frame sensor camera i lei kher kha a ṭûl lo ve thei bawk a ni. Camera lei dawn a thuràwn lâkna tur hre si lo leh thuràwn dik lo dawn avanga camera kan lei hnua kan inchhir ram ram ṭhinna sutkianna tur atan kan hmanna tùr mila camera lei dan tur ka han ziak ang e.
Mizoramah hi chuan tûn dinhmunah innei thlâ lâk hi a hlâwk rih ber hmel a. A chhan chu mi tinina kan dam chhunga kan ropui ber nî-a thlalak ṭha tak nei tur chuan sum han sên deuh pawh kan hnial loh vâng hi niin a lang. Chubakah, eizawn nâ’na han hman dâwna râl-ah chuan sports te, landscape te leh wildlife te hi chu a la huphurhawm deuh a ni.
Mizo te’na wedding kan lâk hi chu a tam ber hi biak in chhunga lak a ni ṭhin a, sâp-ho angin pâwn khaw êng hnuaia hunserh han hman hi a awm ve lêm lo. Chuvangchuan, biak in chhung chu zîm tê pawh a lo ni thei, chutiang hunah chuan lang zau deuh hlek tura kan lak theih nan full frame sensor tal hi hman theih chuan a ṭha. Full frame sensor camera-ah hi chuan crop sensor nena focal length inang renga lak pawh hian a in-wide hleih bakah background blur/bokeh a tam bik a, chu chu thlalak tinalhtu ber pakhat a ni. Biak in chhung thim deuh ruih leh flash han hman mai a rem loh hunah ISO sâng ṭha a pawimawh bawk.
Innei thlâ la tur i nih avangin fps (second khat chhunga camera-in thlâ a lak theih zat) sâng tak i mamawh lo va, 5fps aia sâng kher lei tum tlat a ngai lem lo. A chhan chu han hmeh tlir zawih zawihna tur a awm vak loh bakah speedlight kan hman ṭhin avangin continuous-a thlâ han lâk hian speedlight a chak vak loh chuan hmeh rualin frame zawng zawng a êng hman lo ṭhin. A khaikhawm nâ'n chuan hêngte hi wedding lâk dawna ṭangkai zualte chu an ni: full frame sensor, iso sâng, focus chak.
Nikon D750 hi wedding lâkna tur atân bîka an rawn siam emaw tih mai turin wedding lâk nan ber kher chuan a ṭha em em a. Canon 5D Mark IV el pha tawk tur vela ngaih a ni. DSLR Full frame camera-ah chuan a tê ber pâwl a ni bawk a, a têt avang hian nilenga han lek atan pawh a hahthlak loh deuh tura ngaih a ni. D700 an rawn thlakna kha a ni a, D750-ah hi chuan a LCD a kawih âwn theih a, 24.3 megapixels a rawn ni tawh bawk a ni. Nimahsela, duhthusâm lohna pakhat awm thei chu a shutter speed hi a ni a, 1/4000th ai hian sâng se chuan sawisel tur hi a awm vak lo vang. Shutter speed hniamah chuan pâwn ni sa hnuaiah prime lens-in ƒ/1.8 vêlah thlâ la duh ila 1/4000th shutter speed-ah chuan thlalak a la êng mah mah mai thei a, chutiang hunah tak chuan 1/8000th chin tal hi ni thei se buaina a awm lo. D750 hi a dynamic range a ṭha êm êm bawk a. Thim thamah pawh a focus a chak bik a ni.
Canon 5D Mark III kha photographer tena wedding lak nana an duh ber leh an hman nasat ber tî ila kan sawi sual ka ring lo. Tunah Canon 5D Mark IV a rawn chhuak leh ta a, sawi vak ngai lovin wedding atan chuan a ṭha dawn tih a chiang reng. 5D Mark III ai khan a dynamic range a a ṭha zawk a, a ISO a sâng zawk bawk a, megapixel an rawn sân hlek bawk. Canon skin tone hi sâp-ho pawh hian an lo ngaina em em a, mizo chauh hi canon tone ngaina kan lo ni hauh lo 😎. Tlêm-a vun no leh ngo deuh cheka la duh tân chuan Canon hi a ṭha.
5D Mark III hi canon DSLR camera-ah chuan wedding lâk nâna ṭha ber tî-a sawi theih a ni ṭhin a. Nimahsela, 5D Mark IV a rawn chhuah tâk avang hian a ṭha ber chu a ni ta lo. Mahse, camera thar a rawn chhuah tâk avang hian a lâk tlak ta lo viau ve tihna a ni hauh lo va. Mi tam takin sumdawnna hlawhtlinpui nana an lo hman tawh leh an hman mêk a la ni reng.
• Sony α7R II
Camera rit deuh leh lian deuh hlek hmang peih lo tân chuan Sony α7R II hi a zângkhâi a, a tê fel êt bawk. Sony α7R II hi mirrorless camera a ni a, DSLR anga mirror invaw thlep thuk thuk a awm ve loh avang hian a thâwm pawh a zâwi a, camera nghawr pawh a awm lo. ISO a sâng ṭha a, 42.4 megapixel a rawn ni dâwrh bawk. Body image stabilisation a rawn ken tel avang hian a body hi rit vak lo mahse camera ken chêt avanga thlalak phê ṭhin kha engemaw chenin a rawn tiziaawm thei bawk. Nimahsela, mi nawlpuiin kan thlir dânah chuan camera lian apiang hi ṭha turah kan ngai a, sumdawnnaah chuan mi nawlpui ngaihdan hi thil pawimawh tak a ni bawk si a, chuvangchuan, hê camera hi ṭha viau mahse min ruaitu tur ten camera size aṭanga min teh si chuan kan hna kan chân ve tlat thei 😐. Engpawhnise, camera pian hmang ai chuan kan lâk chhuah result hi a pawimawh ber.
Canon EOS 1Dx te leh Nikon D5 te chu sawi lohva lumah ka dah mai, Nikon leh Canon-ina an camera neih ṭhat ber an ni a, eng lâk nân pawha hmantlâk tura an rawn duan a ni nachungin Sports huanga dah deuh bîk an ni a, a chhan chu a continuous shooting speed hi a sân êm vâng a ni.
