DSLT (Digital Single Lens Translucent) camera hian DSLR camera ang lovin Translucent mirror a hmang a. DSLR-a reflexing mirror inthlep thuk thuk ang kha a ni ve tawh lo va, reflexing mirror aiah translucent mirror hi hman a ni a, a inthlep ve thei tawh lo va, thlâ lak laiin a che ve thei lo a ni. Translucent mirror a nih angin mirror-ah hian thlalak/êng a kal tlang thei a, reflexing mirror ang thovin chung lamah thlalak a chhun kawi thei bawk. Chung lama thlalak a chhun kawi hi viewfinder-ah lut ve tawh lovin Autofocus Sensor-ah a lut chho ta zawk a ni. Translucent mirror hi light-in a chhun tlang a, camera sensor-ah thlalak a thawn lut a ni. Translucent mirror chuan che miah lovin hna hnih a thawk tihna a ni. Thlalak laia mirror a chêt vê tak miah loh avang hian continuous shooting mode a tichak a, mirror inthlepina camera a tihchet dawt dawt thin kha a awm ve tawh lo.
DSLT camera thatna
- Viewfinder-a rawn lang ang chiah chiah kha i thlalak chhuah rawn lan dan tur a ni.
- DSLR aiin autofocus a chak zawk a, focus fuh lo a awm mang lo.
- Live mode-a thlâ lakin DSLR anga focus inzawng trual trual ang kha a awm ve lo va, viewfinder-a lâk nen a focus chak lam a inang reng.
- Mirror chêt avanga camera nghawr a awm ve lo.
- White balance te, exposure te, ISO te leh settings te hi i tihdanglam ang zelin electronic viewfinder-ah i lak tur i hmu ang.
DSLT camera that lohna
- Optical viewfinder hmang lova electronic viewfinder hman a nih avang hian camera On kher lo chuan viewfinder-ah engmah a hmuh theih loh.
- Optical viewfinder aiin electronic viewfinder-ah brightness leh clarity a tlêm zawk.
- Hmun thimah leh shutter speed hniama thlâ lakin viewfinder atanga hmuh a nuam lo.
- Electronic viewfinder hman a nih avang hian thenkhat chu an mit nen a inmil lo thei. Hun rei tak hman tur a nih phei chuan mitin a tuar ang tih a hlauhawm.
- Mirror a chêt ve loh avang hian mirror-a bawlhhlawh kai awlsam takin a tla ve mai thin lo va, chu chuan thlalakah leh autofocus-ah harsatna a thlen thei.
Tunah chuan Sony chiah hian DSLT camera an la siam. DSLT camera hian phase-detection autofocus an hman avang hian DSLR camera aiin still-ah leh video-ah focus a chak zawk. Tunah chuan Canon pawhin phase-detection focus hi chu an rawn hmang ve zeuh zeuh tawh.
Technology thar zawk a nih avang hian DSLR aiin a tha zawk tihna a ni chuang lo. Nimahsela, i hmanna tur azirin DSLT hi DSLR aiin a tha zawk thei. I hmanna tur azirin camera lei la, a to to kha i mamawh petu tur che a ni kher chuang lo mai thei tih te pawh hre tel rawh. Camera lian leh rit keng hlei thei lo tan chuan DSLT camera hi a tha ang a. Eizawn nana photography i hmang a nih erawh chuan i camera lian tak kha camera te tak têa i thlak chuan camera chinchang hre lo mi nawlpui chuan an rin loh phah sawt thei tlat che. Eng pawh ni se, tuntumah chuan i hmanna tur mila camera i lei thiam hi ka duh ber a ni. :)
Sony DSLT camera ka la hman ve loh avangin ka thu ziah hi felhlel deuh pawh a lo awm mai thei. Chutiang dikhlel deuh a lo awm a nih chuan in mi hriatthiamna ka ngen e.
