Kan hmuh phâk chinah hi chuan Roll Film hmang camera hi a hlui ber a nih mai hmel. Obscura camera (camera obscura) te kha chu tlêma han upa fâl bik lo hi chuan kan hmelhriat tawh pawhin a rinawm loh. Roll film camera erawh hi chu kan thlah hlenna pawh a la rei vak lo. Tunah meuh chuan digital camera-in a rawn luahlân ta vek a nih hi. Chuvangchuan, roll film camera chu han ziah lan pawh chakawm viau mahse, tû tân maha hlawkna han awm thei tur a nih tawh loh avangin hmun a uiawm mai mai a ni. Hmanni lawka Digital camera chhuakte pawh thiamna sang chak lutuk avangin hmantlak loh an chang zung zung tawh a nih hi. Tuna camera kan hman tlanglawn ber te hi chi hnihah then a ni a, Digital single lens reflex leh digital rangefinder te hi an ni.
Digital Single-Lens Reflex (DSLR)
Lens kal tlanga mit lawnga camera bihna (viewfinder) atanga kan thla lak tur kan hmuh theihna camera hi DSLR camera chu a ni. Camera lens atanga êng (thlalak) rawn lut kha camera chhûnga darthlalang kil li nei invaw thlep zuk zuk thei (reflexing mirror)-ah a rawn inchhun lut a, chû chuan viewfinder atanga chû thlalak chu kan hmuh theihna turin prism-ah a chhun kawi chho leh a ni. Tichuan, kan thla lak tur kan han tin vang vanga kan han hmehper chiah khan, reflexing mirror chu chung lamah a rawn inthlep chho zuai a, a inlak zawh veleh a rawn inthlep thla leh nghal a ni. Kan hmeh per lai tê kha chuan viewfinder a rawn thim hmak dawn tihna a nih chu. Hetia a kan hmeh per rual chiaha reflexing mirror a rawn inthleh chhoh zuai nachhan chu mirror hian kan thlalak lo save-tu tur ber image sensor a hliah vâng a ni. DSLR camera hi chu lens thlak thleng theih deuh vek an ni a, chu chu a that bik riauna a ni bawk a. Tuna camera kan hmuh theih zinga tha ber a ni bawk. DSLR camera reng reng hi kut ding lama chelh tura design a ni a, veikhawr (left-handed) tân chuan a chelh ringawt pawh hi a inzir tham viau a ni.
Digital Rangefinder
Point and shoot camera tî pawhin an sawi tho a. DSLR camera hnuaia awm a ni a. Thenkhat hi chuan digital camera emaw compact digital camera tîin an sawi mai thin. Mahse, digital camera han tih teh tlawng hi chu a dik lo hlel deuh va, a chhan chu DSLR pawh hi digital camera tho a nih vang a ni. Digital rangefinder camera-ah hi chuan lens a thlak thleng ve theih ngai loh a, camera-in lens a rawn keng sâ a, a thlawn ve theih loh a ni. Chumi camera-ina lens a rawn ken sâ hmang chuan kan thla lak tur kha camera sensor-ah a inthawn lût a, camera sensor atang chuan kan thlalak tur kan hmuh theih nan camera LCD-ah a thlalak a rawn lang chauh a ni. Kan mit lawnga DSLR-a lens kaltlanga thlalak kan hmuh theih ang khan hetah hi chuan a hmuh ve theih loh va, sensor kal tlang tê têin kan lâk tur kha LCD-ah a rawn lang chauh a, LCD-a rawn lang ang chiah khan kan lâk zawh hnuah pawh thlalak kha a rawn lang thin a ni. DSLR-ah chuan sensor a thlen hmaa kan mit lawnga kan en avangin kan hmuh ang ang khan thlalak a rawn inla chhuak zo lo thin. Digital rangefinder camera hi DSLR nên chuan tehkhin tham pawh a ni meuh ṭhin lo va. Hmanhmawh thila thla lak zung zung nan chuan Digital rangefinder hi chu a iaiawm deuh. Digital rangefinder camera thenkhatah hi chuan viewfinder an rawn dah tel tho va, nimahsela, chumi viewfinder chuan camera lens a kaltlang ve lo va, viewfinder lens hranpa a invuah a, thla lak tur kan zoom rual chiaha camera lens chet ruala rawn in-zoom hnai ve zel thei turin an siam a. Chu chu DSLR nen hian a kal hmang a inanna lai a awm a, camera sensor kaltlang lovin kan lak tur kan en ni. Thiamna a rawn sâng leh deuh a, camera sensor kaltlang tho si a, viewfinder atanga thlalak tur kan en theihna camera an rawn siam chhuak leh tawh bawk a, LCD-a en kher lo pawhin viewfinder atanga kan lak tur kan han en pawh hian LCD-a a lan dân nen a inang reng a ni. Point and shoot an han tihna chhan hi chu manual settings te a awm ve thin loh avang hian subject zawna an han focus-a focus a hmuh phawt hnuah chauh a hmehper theih vâng a ni.
